PAKAIAN

DRAMA PENDEK : PAKAIAN...?...!...


TEMPAT : GARAJ KERETA - SIANG
PELAKON : ABANG DAN ADIK.
ARAHAN
ABANG BARU SELESAI MENCUCI KERETA. KEMUDIAN ADIK DATANG HENDAK MASUK, TAPI DI HALANG OLEH ABANG.

ABANG
(HAIRAN) Eh…apa adik pakai ani kan…?
ADIK
Inda abang nampakkan…? Adik ani basar kali ah…!
ABANG
Taliat pulang…(pause) Tapi lain usulnya…
ADIK
(BERSAHAJA) Lain apa…? Mengapa…? Kenapa…?
ABANG
Cuba tah adik liat tu bisai kah usulnya…?
ADIK
Bisai jua ni bang…cemburu kaliah…!
ABANG
Mun pakaian macam atu kan abang cemburukan…bahapa…!
ADIK
Pakaian tradisional kitani jua ni bang, inda jua salah kalau memakain ni, lagi tia best kalau diliat oleh orang luar.
ABANG
Best tia karang mun membari gali usulnya atu, baru orang lokal meliat udah tia inda senunuh, apa lagi orang luar.
ADIK
Ani tah yang dikatakan moden mengikut selira zaman bang, jangan karang kitani dikatakan kolot.
ABANG
Lurus pulang tu…tapi biar tah yang bisai dan indah dipandang mata, ani sepanggal-sepanggal…!
ADIK
Baju kebaya jua ni bang…parasaan adik inda ada salahnya.
ABANG
Sais pulang arah adik tu, tapi mun nganya kan memakai bajunya dada bakain, gali abang meliat eh…!
ADIK
Beseluar jua adik ni bang…mantang-mantang tah kawan abang atu sambat malmari babaju kurung.
ABANG
Mengapa tah pulang adik ke sana…jauh jua.
ADIK
Inda jua apa-apa ni bang…
ABANG
Mun kan bapakaian atu biar tah langkap dan sempurna.
ADIK
Inda jua membari sakit mata ni bang, labih lagi orang lain atu macam-macam gaya diorang.
ABANG
Jangan ikut-ikutan orang lain, apa-apa pun yang kitani pakai atu…saja kan diliat oleh orang tu bah.
ADIK
Ada-ada saja abang ani eh…inda tia ada mod olehnya.
ABANG
Pakaian ani tah lambang keperibadian kitani. Mun pakai baju kebaya beseluar jean…bida jua usulnya kali ah…!

- CUT TO -
______________________________________________________________________

WATAK-WATAK
1 ABANG
2 ADIK.
==============